ಸುದೀಪ್ ಜತೆಗೆ ಮತ್ತೆ ಯಾವಾಗ ಚಿತ್ರ ಮಾಡುತ್ತೀರಾ?
ಹಾಗಂತ ನಿರ್ದೇಶಕ ‘ಜೋಗಿ’ ಪ್ರೇಮ್ ಅವರನ್ನು ಜನ ಕೇಳುತ್ತಲೇ ಇದ್ದರು. ಆದರೆ, ಪ್ರೇಮ್ ಮಾತ್ರ ‘ದಿ ವಿಲನ್’ ನಂತರ, ತಮ್ಮ ಬಾಮೈದ ರಾಣಾ ಅಭಿನಯದಲ್ಲಿ ‘ಏಕ್ ಲವ್ ಯಾ’ ಚಿತ್ರ ಮಾಡಿದ್ದರು. ಆ ಚಿತ್ರದ ಚಿತ್ರೀಕರಣ ಬಹುತೇಕ ಮುಗಿದಿದ್ದು, ಮುಂದಿನ ವರ್ಷ ಬಿಡುಗಡೆಯಾಗಲಿದೆ.ಈ ಮಧ್ಯೆ, ಸುದೀಪ್ ಜತೆಗೆ ಒಂದು ಚಿತ್ರ ಮಾಡುವುದಾಗಿ ಪ್ರೇಮ್ ಹೇಳಿಕೊಂಡಿದ್ದಾರೆ. ಇದುವರೆಗೂ ಕಾಣಿಸಿಕೊಳ್ಳದ ಹೊಸ ಅವತಾರದಲ್ಲಿ ಸುದೀಪ್ ಈ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ಪ್ರೇಮ್ ಹೇಳಿಕೊಂಡಿದ್ದಾರೆ.ಇಂದು ಸುದೀಪ್ ಅವರ 47ನೇ ಹುಟ್ಟುಹಬ್ಬ, ಈ ಸಂದರ್ಭದಲ್ಲಿ ಅವರಿಗೆ ಶುಭಾಶಯ ತಿಳಿಸಿರುವ ಪ್ರೇಮ್, ತಮ್ಮ ಡಾರ್ಲಿಂಗ್ ಜತೆಗೆ ಇನ್ನೊಂದು ಚಿತ್ರ ಮಾಡುವುದಾಗಿ ಹೇಳಿಕೊಂಡಿದ್ದಾರೆ.
ಈ ಕುರಿತು ಟ್ವೀಟ್ ಮಾಡಿರುವ ಅವರು, ‘ನನ್ನ ಮುಂದಿನ ಚಿತ್ರ ಯಾವುದು ಮತ್ತು ನನ್ನ ಡಾರ್ಲಿಂಗ್ ಸುದೀಪ್ ಅವರ ಜತೆಗೆ ಮತ್ತೆ ಯಾವಾಗ ಕೆಲಸ ಮಾಡುತ್ತೀನಿ ಎಂದು ಎಲ್ಲರೂ ಕೇಳುತ್ತಲೇ ಇದ್ದರು. ಸುದೀಪ್ ಅವರ ಹುಟ್ಟುಹಬ್ಬದ ಶುಭಸಂದರ್ಭದಲ್ಲಿ, ಅವರ ಜತೆಗೆ ಇನ್ನೊಂದು ಚಿತ್ರ ಮಾಡುತ್ತಿರುವುದಾಗಿ ಘೋಷಿಸುತ್ತಿದ್ದೇನೆ. ಇದುವರೆಗೂ ಕಾಣಿಸಿಕೊಳ್ಳದ ಹೊಸ ಅವತಾರದಲ್ಲಿ ಸುದೀಪ್ ಈ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ’ ಎಂದು ಪ್ರೇಮ್ ಹೇಳಿದ್ದಾರೆ.ಇದಕ್ಕೂ ಮುನ್ನ ಶಿವರಾಜಕುಮಾರ್ ಮತ್ತು ಸುದೀಪ್ ಅಭಿನಯದಲ್ಲಿ ‘ದಿ ವಿಲನ್’ ಚಿತ್ರ ಮಾಡಿದ್ದರು ಪ್ರೇಮ್. ಈ ಚಿತ್ರ ನಿರೀಕ್ಷಿತ ಯಶಸ್ಸು ಕಾಣಲಿಲ್ಲ. ಆದರೆ, ಪ್ರೇಮ್ ಕೆಲಸ ಮತ್ತು ಅವರಿಗಿರುವ ಸಿನಿಮಾ ಪ್ರೀತಿಯ ಬಗ್ಗೆ ಸುದೀಪ್ ಹಾಡಿ ಹೊಗಳಿದ್ದರು. ಚಿತ್ರದ ಯಶಸ್ಸು, ಸೋಲು ಪಕ್ಕಕ್ಕಿಟ್ಟು ಮುಂದೊಂದು ದಿನ ಅವಕಾಶ ಸಿಕ್ಕರೆ ಅವರ ಜತೆಗೆ ಮತ್ತೆ ಕೆಲಸ ಮಾಡುವುದಾಗಿ ಹೇಳಿದ್ದರು. ಅದಕ್ಕೆ ತಕ್ಕ ಹಾಗೆ, ಪ್ರೇಮ್ ಇದೀಗ ಒಂದು ವೇದಿಕೆ ಕಲ್ಪಿಸಿದ್ದಾರೆ.
ಸುದೀಪ್ ಮತ್ತು ಪ್ರೇಮ್ ಇಬ್ಬರೂ ತಮ್ತಮ್ಮ ಚಿತ್ರಗಳಲ್ಲಿ ಬ್ಯುಸಿ ಇರುವುದರಿಂದ, ಹಳೆಯ ಕಮಿಟ್ಮೆಂಟ್ಗಳೆಲ್ಲಾ ಮುಗಿದ ನಂತರ ಈ ಚಿತ್ರ ಪ್ರಾರಂಭವಾಗುವ ಸಾಧ್ಯತೆ ಇದೆ.